'Yan Bindiga Da Dama Sun Miƙa Wuya Tare Da Ajiye Makamansu Bayan Shan Gumurzu Da Sojoji A Katsina

Daga Aminu Bala Madobi

Wasu shuwagabannin ‘yan bindiga waɗanda suka addabi yankin Batsari, Safana da Jibia a jihar Katsina, sun miƙa wuya tare da aje makamansu bayan gumurzu da sojoji, domin rungumar zaman lafiya.

Rahotonni sunce shuwagabannin ‘yan bin-digar da suka miƙa wuya, sun hada da ƙasurgumin dan fashin daji, Abu Radda, Umar Black da Abdullahi Lanƙai, Jijjige da kuma dabar Musa Ɗan gandu daga yankin garin Jibia a Katsina.

A cikin jawaban tubabbun ‘yan bindigar sun nemi gwamnati ta duba bukatunsu wajen gina masu kasuwanni da asibitoci da kuma samar musu da ruwan sha, domin yin rayuwa mai inganci.

A yayin zaman kungiyar mutanen yankin da matsalar tsaro ta shafa karkashin jagorancin Comrd Hamisu S Batsari, sune suka wakilci al’ummar da matsalar tsaron ta shafa a yankunan.

A karshe, shuwagabannin ‘yan bin-digar sun miƙa makamansu ga sojojin, inda suka sako wasu mutanen da suka yi garkuwa da su tare da ɗaukar alkawarin rungumar zaman lafiya.