Gwamnatin tarayya za ta gurfanar da wasu mutum biyar da ake zargi da ta’addanci a gaban wata Kotun tarayya da ke Abuja a ranar Litinin.
Ana zargin mutanen da gudanar da ta’addancinsu a karkashin fitaccen shugaban ‘yan ta’adda, Bello Turji.
Za a gurfanar da mutanen ne ta ofishin Antoni Janar na Tarayya (AGF) a gaban Mai Shari’a Emeka Nwite. Duk da cewa an shirya gurfanar da su a ranar Juma’a, ba a iya karɓar karar su ba saboda babu lauya da ya tsaya musu.
Lauyan AGF, David Kaswe, ya nemi a dage shari’ar don ba su dama su samo lauya na zaɓin su, kuma Mai Shari’a Nwite ya ɗage zuwa Litinin domin gurfanar da su.
Gwamnatin Tarayya, ta hannun ofishin AGF, ta shigar da ƙarar mutum takwas a cikin tuhume-tuhume 11 da aka lamba: FHC/ABJ/CR/633/2024. Cikin waɗannan mutum takwas, uku sun tsere.
A ƙarar da daraktan sashen gabatar da kararraki na tarayya, M.B. Abubakar, ya shigar a ranar 16 ga Disamba, Musa Kamarawa; Abubakar Hashimu, wanda aka fi sani da Doctor; Bashir Abdullahi; Samuel Chinedu da Lucky Chukwuma, su ne waɗanda aka shigar a matsayin na farko zuwa na biyar.
Bello Turji, Aminu Muhammad da Sani Lawal, waɗanda ba su zo hannu ba kuma an shigar da su a matsayin na shida zuwa na takwas.
Ana zargin su da bayar da tallafin kayan aiki ga kungiyoyin ‘yan ta’adda da Turji ke jagoranta, kamar samar da mayagun ƙwayoyi, kayan abinci; kayan sojoji da ‘yan sanda, da sauransu.
Haka nan, ana zargin su da bayar da siminti, kwanon rufin gida, buhunan ƙusa, ƙarfe, da sauran kayan gini ga sansanonin ‘yan ta’adda a dazukan Zamfara, Sakkwato da Kaduna.
Laifin ya saba da Sashe na 17 na dokar hana ta’addanci ta 2013
NAN
Domin samun sauran shirye shiryenmu zaku iya biyo mu ta wannan shafukan👇
https://twitter.com/Musabestseller?s=09
https://www.facebook.com/profile.php?id=100089640289165
https://www.threads.net/@alfijirlabarai
https://www.youtube.com/@BestsellerChannel12
https://www.instagram.com/musa_bestseller?utm_source=qr&r=nametag
Ko a latsa nan don shiga Group Whatsapp na Alfijr Labarai 👇👇
https://chat.whatsapp.com/ELQRQyq1zGn7zpAVP8DwNj