Hukumar Kula da Ingancin Abinci da Magunguna ta Najeriya (NAFDAC) ta ce ta kwashe kayayyaki 7,210 da ba su cika ka’idojin lafiya da aminci ba, bayan gudanar da binciken sa ido a cibiyoyi 6,233 a fadin Najeriya.
Hukumar ta ce aikin ya gudana daga Mayu zuwa Yuli 2026, inda aka duba cibiyoyi a dukkan jihohin Najeriya 36 da kuma Babban Birnin Tarayya, Abuja.
Kayayyakin da aka kwashe sun hada da abinci da ruwa, magunguna da kayan gargajiya, kayan aikin lafiya, alluran rigakafi da sauran kayayyakin lafiya, kayan kwalliya da sinadarai.
Daraktar-Janar ta NAFDAC, Prof. Mojisola Adeyeye, ta bayyana hakan a wani taron manema labarai, inda ta ce hukumar na ci gaba da kara kaimi wajen dakile yaduwar kayayyakin jabu, marasa inganci ko wadanda ba su da rajista a kasuwannin Najeriya.
KORAFE-KORAFE 225 A WATAN AGUSTA
NAFDAC ta kuma bayyana cewa ta samu korafe-korafe 225 daga jama’a a watan Agusta 2026 kan kayayyakin da ake zargin na jabu ko marasa aminci.
Hukumar ta bukaci ‘yan Najeriya da su rika kai rahoton kayayyakin da ake zargi kai tsaye ga NAFDAC, maimakon dogaro da yada zarge-zarge a kafafen sada zumunta kawai.
A cewar hukumar, rahotannin jama’a na taimakawa wajen gano wuraren da ake bukatar gudanar da bincike, tare da daukar samfurori da gudanar da gwaje-gwajen kimiyya.
NAFDAC TA GARGADI KAN MAGANGANUN SOCIAL MEDIA
Prof. Adeyeye ta kuma yi gargadin cewa zargin da ake yadawa a kafafen sada zumunta ba ya zama hujjar cewa wani abinci ko magani na jabu ne ko kuma yana da illa.
Ta ce dole ne a gudanar da gwajin dakin bincike da cikakken binciken hukumomi kafin tabbatar da irin wadannan zarge-zarge.
DAMUWA KAN MANJA DA FUFU
NAFDAC ta kuma bayyana damuwa kan rahotannin amfani da wasu sinadarai masu hadari wajen sarrafa wasu kayan abinci.
Hukumar ta ce an lura da wasu lokuta na hada manja da azo dyes da wasu sinadarai masu illa, yayin da kuma aka samu rahotannin amfani da bleach da wasu sinadarai wajen sarrafa fufu da wasu kayan abinci.
Sai dai NAFDAC ta bayyana cewa manja da fufu da ba su da alama ko rajista kuma ake sayar da su a kasuwannin gargajiya ba sa karkashin cikakken ikon kula da hukumar kai tsaye, don haka ta bukaci hukumomin jihohi da kananan hukumomi su kara sa ido kan irin wadannan kayayyaki.
SAKON NAFDAC GA JAMA’A
NAFDAC ta bukaci ‘yan Najeriya da su kasance masu taka-tsantsan wajen sayen abinci, magunguna, kayan kwalliya da sauran kayayyakin da ake amfani da su.
Hukumar ta kuma tunatar da jama’a cewa ana iya amfani da tsarin NAFDAC na tantance rajistar kayayyaki domin tabbatar da sahihancin lambar NAFDAC kafin sayen kayayyakin da hukumar ke kula da su.
NAFDAC ta ce za ta ci gaba da gudanar da bincike, kwace kayayyaki, dakatar da wuraren da suka saba ka’ida da kuma daukar matakin doka a kan wadanda aka tabbatar da cewa sun karya dokokin kula da lafiya da amincin jama’a.
Ga masu son bada talla ko shawarwari a kira wannan lambar +2348032077835
Domin samun sauran shirye-shirye Alfijir labarai/Alfijir news ku biyo mu ta nan 👇
https://twitter.com/Musabestseller?s=09
https://www.facebook.com/profile.php?id=100089640289165
https://www.threads.net/@alfijirlabarai
https://www.youtube.com/@BestsellerChannel12
https://www.instagram.com/musa_bestseller?utm_source=qr&r=nametag
Alfijir labarai Alfijir News Whatsapp Group 👇👇
https://chat.whatsapp.com/H5oBRaZBdCVIyOTIV5eMfb?mode=ac_t